Maite khaw kawng a ping, bialtu MLA ke in luh tum

by Editor

Tualchhung News

Zoram Today 29th May, 2024 (Wed): Keifang chhak Tawi tlang bulthuta awm, Maite khua chu nizan hmasa ruahsur nasa avangin khaw kar kawngah leimin thahnem tak a awm a, vawiin thleng hian tlawh pawh theih a la ni lo. Hetih lai hian vawiin tlai lam khan Tawi bialtu MLA, Minister Prof. Lalnilawma chu a bialchhunga chhiatna hrang hrang thlengte a hmunah endik turin Aizawl a chhuahsan a, Maite pawh hi ke in tlawh a tum niin thudawn a ni a, amaherawhchu, Tuirial bula kawng min in a dan avangin Aizawl an let leh nia hriat a ni.

Maite leh Tawizo khaw inkar, 12 kms ringawt ah pawh hmun 40 velah kawng chanve bal leh leimin in kawng a hnawh khawtlang hruaitute chuan vawiin an endikna lamah an hmu, niin kan thu dawnna chuan a tarlang.

Maite chawmtu power lakluhna hrui pawh thing tluin a vawchhe nual bawk, tunthleng hian current eng an la nei lova, leimin thenfai leh kawng tla bal siamthat vat anihloh chuan khaw mipuite'n harsatna an tawk thuai dawn niin thu dawn a ni. Maite ah hian mihring 1000 chuang an cheng mek.